സദ്ഗുരു

Image from

Limited Edition

പണ്ട് പണ്ട്.. എന്നു വച്ചാൽ വളരെ പണ്ട്.. ഒരു കിനാവ് കാണുമായിരുന്നു. കിനാവ് എന്താണെന്നു വച്ചാൽ : പഠിത്തമൊക്കെ കഴിഞ്ഞ് ഒരു ഉദ്യോഗസ്ഥയാകും. അപ്പോൾ അങ്ങകലെ, എല്ലാവരിൽ നിന്നും; എന്നു വച്ചാൽ  അറിയാവുന്ന എല്ലാവരിൽ നിന്നും അകലെ, അവിടെയാണ് ഉദ്യോഗം. അവിടെ ഒരു മുറി. ഒരു മേശ, ഒരു കസേര  , ഒരു കട്ടിൽ. പിന്നെ പുസ്തകങ്ങൾ. കഴിഞ്ഞു ! സ്ഥാവരജംഗമമെല്ലാം.. അപ്പോൾ അങ്ങനെയാണ്, അങ്ങകലെ പ്രകൃതിരമണീയത കളിയാടുന്ന ഒരിടത്ത്: മനുഷ്യരെ അകറ്റി നിർത്തി, പുസ്തകങ്ങളുമായി ഒരു ജീവിതം. ഇതൊരു കിനാവായിരുന്നു.

കാലം മാറി. കിനാവ് കനവായ് തുടർന്നില്ല. അതായത് സ്വപ്നസാക്ഷാത്കാരമായി. ഉദ്യോഗം കോളേജധ്യാപിക. ഇടം കാസർഗോഡ് ജില്ലയിലെ ചീമേനി. ആരും അത്ര പെട്ടെന്ന് തേടി വരില്ല. അവിടെ മനുഷ്യത്വം നിറഞ്ഞിടത്ത് ഒരു ബാൽക്കണി. ബാൽക്കണിയിൽ ഒരു മുറി. മുറിയിൽ മേൽപറഞ്ഞ സ്ഥാവരജംഗമം.വെളുപ്പാൻകാലത്ത് കിളികളുടെ കൊഞ്ചലും നറുംമഞ്ഞും, വൈകുന്നേരം ചൂളം കുത്തിവരുന്ന തണുത്തകാറ്റും, പോരേ? ആകപ്പാടെ സ്വപ്നസുന്ദരസുരഭില ജീവിതം.

പക്ഷെ കിനാവ് നേരായി വന്നപ്പോൾ പടച്ചവൻ ഒരു പറ്റു പറ്റിച്ചു.എന്നെ കെട്ടു കെട്ടിച്ചു. എന്നു വച്ചാൽ കെട്ടിച്ചു വിട്ടു. പ്രാരാബ്ധക്കാരിയാക്കി! ഇല്ലെങ്കിൽ ഈ വനവാസത്തിൽ തന്നെ സന്ന്യാസം സ്വീകരിച്ച് മോക്ഷപദം പ്രാപിച്ചെങ്കിലോ എന്നു കരുതിയായിരിക്കണം. കനവ് യാഥാർത്ഥ്യമായി, എന്നാൽ ഈ കനവ് അധികകാലം നീളല്ലേ എന്ന് പ്രാർത്ഥിച്ചു പോകുന്നു.

ഇതാണ് എന്ടെ പടച്ചോൻ. എല്ലാ ബാക്ഗ്രൗണ്ട് വർക്കും നടത്തിയ ശേഷമേ എന്നെ കളത്തിലിറക്കൂ. നിനക്കു നമോവാകം!

(കടപ്പാട് : ശിങ്കിടിമുങ്കൻ )

 

 അടിക്കുറിപ്പ് : കനവ് അധികകാലം  നീണ്ടില്ല ! ഒരു കൊല്ലം കഴിഞ്ഞ് പ്രാരാബ്ധങ്ങളിലേക്ക് തിരിച്ചെത്തി.

ഭഗവൽസ്വരൂപധ്യാനം

copyright 

വജ്രാദിരേഖാങ്കിതം പാദപത്മം
സർവ്വപാപവിനാശം മനസാ സ്മരാമി
ശ്രീലളിതാപരിസേവിതം പുണ്യതീർത്ഥം
പാദസരോരുഹം ശിരസാ നമാമി.

മഹാഗരുഡാരൂഢം ഊരുദ്വയം
പീതവസനാവൃതം ചാരുകടിതടം
ബ്രഹ്മനിലയം പദ്മനാഭീസ്ഥാനം
ധ്യായേത്‌ മരതകശോഭിതസ്തനം.

ലക്ഷ്മീനിവാസിതം വക്ഷപ്രദേശം
കൗസ്തുഭ വനമാലാർച്ചിതകണ്ഠപ്രദേശം
പാലാഴീമഥനവീര്യം തൃക്കരങ്ങൾ
അഥ ശംഖചക്രഗദാപത്മം പ്രണാമം.

വിശ്വമോഹനം ഭക്തവത്സലാനനം
ഇന്ദ്രനീലാളകപരിലാളിതഫാലം
ചില്ലിയുഗളപാലകകമലനേത്രം
മതിമോഹനം കാരുണ്യകടാക്ഷം.

മകരകുണ്ഡലപ്രശോഭിതം കവിൾത്തടങ്ങൾ
സ്നേഹസ്മൃണഹാസിതം ചെഞ്ചുണ്ടുകൾ
നവമല്ലികാമുകുളലാവണ്യം ദന്തനിരകൾ
ഇദം സുന്ദരാനനം ഭക്ത്യാ അമൃതപാനം.

രാമദൂതം

copyright

ചിത്തേ രാമൻ തെളിഞ്ഞു വാണീടുകിൽ,

ചിത്തം വിശുദ്ധമായ്‌ മാരുതി കാത്തോളും.

സരസ്വതീവന്ദനം

അക്ഷരസ്വരൂപിണി   വീണാവാദിനി   നാഥേ  

ജ്ഞാനപ്രദായിനി  വേദവാഹിനി  വരദേ 

ശുഭദായികേ  ശുഭ്രധാരിണി   ദേവീ 

വന്ദേ  ശ്രീ  സരസ്വതി   മാതേ !  

വിരഹസന്ധ്യ

 

http://smrithijaalakam.blogspot.in/2011/03/blog-post.html 

അരുണസന്ധ്യ ഒരു നേർത്തതേങ്ങലായ്‌ ഉരുകിയലിയുന്നുവോ,
അകലെ വാനിലാപ്രണയസത്യത്തെ തേടിയലയുന്നുവോ!

നിമിഷശലഭമായ്‌ വാഴ്‌വിൽ വർണ്ണരാജി പടർത്തുന്നുവോ,
വിരഹശോകമാം രാഗമെന്നും പതിയെ പാടുന്നുവോ!

തിരയിടും മോഹമായിരം ദീപമായ്‌ തെളിയുന്നുവോ,
മിഴിയുതിർക്കുന്ന ജലകണങ്ങളൊരു യമുനയാകുന്നുവോ!

ഒടുവിലാരാവിൻ മാറിൽ വീണലിഞ്ഞു തീരുന്നുവോ,
പ്രിയതമൻ വരും നാളെ,യെന്നൊരു സ്വപ്നം കാണുന്നുവോ..

സ്മൃതി

പ്രേമസ്വരൂപൻ തൻ പ്രേയസി രാധാറാണി
താവക വിരഹത്താ,ലശ്രുവിലാനന്ദിച്ചു.

രാധാ രാധാ കൃഷ്ണാ...

മൂലോകത്തിനും ദേവൻ തൻ പ്രാണനാദനന്ന-
ങാനന്ദനടനമാടിയതാണീ ഭൂമിയിൽ;

രാധാ രാധാ കൃഷ്ണാ...

രാസരസപൂർണ്ണ ലാസ്യനാട്യത്തോടവൻ
ആനന്ദചിന്മയൻ, മഞ്ജുളബാലകൻ-

രാധാ രാധാ കൃഷ്ണാ...

തന്മനോമുരളിയിൽ മാധുര്യം നിറച്ചവൻ
പാടിയതാണന്നോരോ ചേലെഴും ശീലുകൾ.

രാധാ രാധാ കൃഷ്ണാ...

കാളിന്ദീ നദി,യപ്പോൾ ഗോപസ്ത്രീരമണന്റെ
ശ്രീരാഗധാരയിലലിഞ്ഞു ചേർന്നല്ലോ!

രാധാ രാധാ കൃഷ്ണാ...

ചാരുതരുനിര തൻ ഭാഗ്യാതിരേകത്താൽ
ശ്രീപതീപദാംബുജം തഴുകാൻ മോഹിച്ചല്ലോ!

രാധാ രാധാ കൃഷ്ണാ...

ആനന്ദലഹരിയിലാറാടി ഭൂമിദേവി
ശ്രീപുരുഷോത്തമൻ വാണീടും ഭാഗ്യകാലം!

രാധാ രാധാ കൃഷ്ണാ...

ആ സുഖസ്മൃതികളി,ലാനന്ദിക്കുന്നുവിന്നും
ശ്രീരാഗദേവൻ തൻ മോഹിനി രാധാറാണി.

രാധാ രാധാ കൃഷ്ണാ...